Kryeministri i Kosovës, Albin Kurti, ka përkujtuar veprimtarin dhe intelektualin e shquar Fehmi Agani, në 26-vjetorin e vrasjes së tij nga forcat serbe gjatë luftës së vitit 1999.

Në një deklaratë përkujtimore, Kurti theksoi se 6 maji i vitit 1999 shënon një nga ditët më të dhimbshme për popullin shqiptar, kur regjimi serb ndaloi një tren që po udhëtonte drejt Maqedonisë dhe rrëmbeu pasagjerët, përfshirë edhe sociologun dhe politikanin Fehmi Agani. Trupi i tij u gjet një ditë më pas, pranë Lipjanit.

“Krimet e Serbisë nuk falen e nuk harrohen. Plagët janë të pashërueshme. Mungesa e drejtësisë vendore dhe ndërkombëtare duhet të marrë fund. Lavdi për jetën, veprën dhe sakrificën e Fehmi Aganit,” përfundoi Kurti.

Fehmi Agani ishte një nga bashkëthemeluesit e Lidhjes Demokratike të Kosovës dhe një nga figurat më të rëndësishme të rezistencës paqësore ndaj regjimit serb gjatë viteve ’90.