Moskonstituimi i Kuvendit të Kosovës pas zgjedhjeve të fundit po krijon pasoja të thella dhe shumëdimensionale për vendin.

Ndërkohë që vendimmarrja politike është bllokuar dhe institucionet nuk janë formuar ende, Kosova po humb mundësi të mëdha për zhvillim ekonomik, përfitim nga fondet ndërkombëtare dhe avancim drejt integrimit evropian.

Ekspertë të ekonomisë dhe përfaqësues të bizneseve paralajmërojnë për dëme që mund të jenë të pakthyeshme, duke përfshirë humbjen e qindra milionë eurove nga fondet ndërkombëtare, largimin e investitorëve të huaj, si dhe rrezik për tkurrjen e prodhimit vendor dhe ikjen e kapitalit.

Në rrezik janë rreth 900 milionë euro nga Komisioni Evropian, të ndërlidhura me agjendën e reformave për zhvillim dhe integrim evropian, si dhe mbi 220 milionë euro nga Korporata e Sfidave të Mijëvjeçarit (MCC), që synojnë përmirësimin e infrastrukturës energjetike dhe zhvillimin ekonomik, si dhe investime kapitale në projekte strategjike si ai i autostradave dhe hekurudhave.

 

Shala: Kosova po humb mbi 1.2 miliardë euro për shkak të moskonstituimit të Kuvendit

Deputeti i Partisë Demokratike të Kosovës (PDK), Ferat Shala, për FrontOnline ka paralajmëruar për pasoja të rënda ekonomike që po i kanosen vendit për shkak të vonesave në konstituimin e Kuvendit dhe mungesës së formimit të qeverisë së re.

“Vonesa e konstituimit të Kuvendit të Kosovës do të reflektojë shumë në ekonomi, si rezultat i mungesës së fondeve ndërkombëtare,” deklaroi Shala.

Sipas tij, vetëm nga mandati i kaluar i Qeverisë janë 300 milionë euro të bllokuara për shkak të sanksioneve, ndërkohë që është pezulluar edhe thithja e fondeve evropiane në vlerë prej 800 deri në 900 milionë euro, të cilat ishin paraparë të investoheshin në infrastrukturë dhe mjedis.

“300 milionë euro janë nga mandati i kaluar i Qeverisë të bllokuara për shkak të sanksioneve dhe pjesa tjetër thithja e fondeve evropiane që janë rreth 800-900 milion euro mjete që do të duhej të i alokonomin drejt infrastrurës dhe mjedisit. Në total ne kemi 1 miliard e 200 milion euro, mjete të cilat po të konstituohej Kuvendi dhe të bëhej qeveria, do të mund t’i merrnim në të mirë të vendit,” theksoi Shala për FrontOnline.

Ai shtoi se përveç ndikimit në projekte zhvillimore, këto fonde do të kishin reflektuar pozitivisht edhe në stabilizimin ekonomik të vendit dhe në lehtësimin e krizës inflacionare.

“Kjo do të reflektonte në zbutje të ekonomisë dhe ta stabilizonte pak a shumë inflacionin,” tha më tej deputeti i PDK-së.

 

 

Gërxhaliu: Moskonstituimi i Kuvendit po e dëmton Kosovën në mënyrë katastrofike ekonomikisht dhe po e ndalon integrimin evropian

Ish-kryetari i Odës Ekonomike të Kosovës, Safet Gërxhaliu, për FrontOnline ka paralajmëruar pasoja të rënda në shumë fusha si rezultat i moskonstituimit të Kuvendit dhe mungesës së institucioneve funksionale në vend.

“Mungesa e krijimit të institucioneve në parlament dhe qeveri, është duke e dëmtuar Kosovën në disa dimensione. Është shqetësues efekti negativ i mos krijimit të institucioneve në aspektin politik, katastrofik në aspektin ekonomik dhe stopues në proceset integruese,” deklaroi Gërxhaliu.

Ai e konsideroi të papranueshme që në një kohë me zhvillime të mëdha globale, Kosova të ngecë në formimin e institucioneve.

“Në këtë dinamikë që po përcillen trendet globale, të eksperimentohet me themelimin e institucioneve është turp i madh,” u shpreh ai, duke shtuar se dëmi ekonomik është alarmant.

Sipas Gërxhaliut, një ndër pasojat më të rënda është pezullimi i qasjes në fondet e Bashkimit Evropian për Kosovën, një zhvillim që ndikon drejtpërdrejt në ngadalësimin e rritjes ekonomike dhe bllokimin e projekteve strategjike.

“Vet fakti që është pezulluar qasja në fondet për Kosovën nga Bashkimi Evropian është e rëndë,” tha ai.

“Në mungesë të një dialogu publiko-privat, po dëmtohen bizneset – shto këtu edhe shtrenjtimin e rrymës për bizneset,” theksoi Gërxhaliu për FrontOnline

Ai paralajmëroi se situata aktuale po rrezikon seriozisht të çojë në tkurrje të eksporteve, ikje të kapitalit dhe të prodhimit ‘Made in Kosovo’, përveç migrimit të qytetarëve.

“Është rrezik për tkurrje të eksporteve dhe për ikje, jo vetëm të qytetarëve, jo vetëm të kapitalit, por edhe të prodhimit ‘Made in Kosovo’, dhe këto do të lënë gjurmë për Kosovën,” përfundoi Gërxhaliu për FrontOnline.

 

 

Dreshaj: Vonesa në konstituimin e Kuvendit po i kushton Kosovës miliona euro dhe rrezikon integrimin evropian

Kreu i Lidhjes së Bizneseve të Kosovës, Besart Dreshaj, për FrontOnline ka ngritur alarmin për pasojat e rënda ekonomike që po i kanosen vendit për shkak të vonesave në krijimin e institucioneve pas zgjedhjeve.

“Këto vonesa në krijimin e institucioneve të reja, Kosovës mund t’i kushtojnë miliona euro,” deklaroi Dreshaj, duke nënvizuar se situata e krijuar po minon zhvillimin ekonomik dhe perspektivën evropiane të vendit.

Sipas tij, një ndër rreziqet më të mëdha është humbja e 900 milionë eurove nga Komisioni Evropian, të cilat janë të lidhura me mosratifikimin e agjendës së reformave që do të ndihmonte Kosovën në zhvillim ekonomik dhe avancim drejt integrimit në Bashkimin Evropian.

“Në rrezik janë 900 milionë nga Komisioni Evropian për shkak të mosratifikimit të agjendës së reformave që do të ndihmonte në zhvillimin ekonomik dhe avancimin e integrimit në BE,” theksoi Dreshaj për FrontOnline.

Ai paralajmëroi gjithashtu se situata e bllokimit institucional po reflekton në shumë fusha të rëndësishme për funksionimin e shtetit dhe ekonomisë.

“Pastaj buxheti, implementimi i projekteve, pastaj investimet e huaja, bllokimi i bordeve, mungesa e vendimmarrjes, mungesa e reformave – legjislacion dhe reforma fiskale,” janë disa nga aspektet që, sipas Dreshajt, po pësojnë nga kjo krizë institucionale.

Një tjetër shqetësim i ngritur nga Dreshaj është keqpërdorimi i agjencive të pavarura, që sipas tij, në mungesë të mbikëqyrjes institucionale, po marrin vendime të dëmshme për qytetarët dhe ekonominë.

“Situatat e tilla shfrytëzimi i disa agjencioneve të pavarura si ZRRE, që i shërbejnë interesave të dikujt në dëm të qytetarëve dhe zhvillimit ekonomik me vendimet e tyre,” paralajmëroi ai.

 

 

Shahini: Kosova rrezikon humbje ekonomike mbi 1.2 miliardë euro për shkak të moskonstituimit të Kuvendit

 

Kryetari i Aleancës Kosovare të Bizneseve (AKB), Agim Shahini, për FrontOnline ka ngritur shqetësime serioze për pasojat ekonomike dhe politike që po i kanosen Kosovës si rezultat i moskonstituimit të Kuvendit të ri.

“AKB e vlerëson mos konstituimin e Kuvendit të Kosovës si dëm të madh në aspekt politik dhe ekonomik, ku do të jenë të pariparueshme dhe të pa kompensueshme,” ka deklaruar Shahini, duke theksuar se mungesa e institucioneve po ndikon në ngecjen e proceseve jetike për vendin.

Sipas tij, pa institucione funksionale nuk mund të ratifikohen një sërë marrëveshjesh ndërkombëtare, që janë kyçe për zhvillimin ekonomik dhe administrativ të vendit. Një nga humbjet më të mëdha potenciale është ndërlidhur me Fondin për Rritje Ekonomike.

“Vetëm nga Fondi për Rritje Ekonomike, ku Kosova mund të i fitojë mbi 880 milion euro, kjo bëhet diskutabile dhe këto mjete mund të barten në një vend tjetër,” tha ai për FrontOnline.

Përveç kësaj, edhe fondet e Korporatës së Sfidave të Mijëvjeçarit (MCC), që kapin vlerën e mbi 220 milionë eurove, janë në rrezik të mosrealizimit.

“Nëse i mbledhim të gjitha këto mjete, Kosova rrezikon të i humbë mbi 1 miliardë e 200 milion euro që do të mund të i merrte brenda këtij viti, për rritje ekonomike dhe për mbështetje të ndryshme,” përfundoi Shahini.

 

 

Komento:

	Komenti