Deputetja e Lëvizjes Vetëvendosje, Arjeta Fejza, tha se bllokada e vazhdueshme për konstituimin e Kuvendit është bërë tashmë e mërzitshme për qytetarët e Kosovës. Pas dështimit të përpjekjes së njëmbëdhjetë për konstituimin e Kuvendit të Kosovës, ajo ka akuzuar opozitën për “një qasje destruktive” që nga fillimi i këtij procesi.

Sipas Fejzës, opozita fillimisht ka refuzuar votimin e mandateve dhe tani po vazhdon me pengesa të tjera, duke e zvarritur procesin pavarësisht përpjekjeve të VV-së për të gjetur një zgjidhje. Ajo theksoi se janë mbajtur takime konsultative mes partive politike të ftuara nga kryesuesi i Kuvendit dhe se kryetari i VV-së ka ftuar liderët e partive opozitare për dialog.

Duke folur në ‘INFO PLUS’ në RTK, Fejza shtoi se është propozuar edhe ndryshimi i mënyrës së votimit në Kuvendin e Kosovës. Ajo përmendi edhe letrën që kryetari i VV-së i ka dërguar kryetarit të LDK-së. Ajo kritikoi qëndrimet e opozitës lidhur me emrin e Albulena Haxhiut, duke i cilësuar si ofendime dhe përshtypje subjektive, jo argumente.

“Ne po ju themi, në këtë situatë jemi të paafatizuar. Votojeni ju kryetarin e Kuvendit dhe i kemi 15 ditë për ta bërë qeverinë, e pastaj e shohim a i kemi apo jo votat. Nëse ata janë të bindur që ne nuk i kemi votat, kjo do t’u ndihmonte atyre. Por unë besoj që qëllimi është njëfarë bllokimi që për mua është absurd,” deklaroi Fejza në RTK.

 

Komento:

	Komenti