Në një fjalim në Samitin Ekonomik të Euroazisë, ish-Ministri i Jashtëm i Kosovës, Enver Hoxhaj, theksoi se bota ndodhet në një periudhë të ndërmjetme gjeopolitike, ku forca po merr gjithnjë e më shumë hapësirë ndaj diplomacisë dhe dialogut.

Sipas tij, paqja e qëndrueshme nuk mund të ndërtohet mbi presionin ushtarak apo logjikën e fuqisë, por vetëm përmes një dialogu të sinqertë dhe strategjik.

“Është e vërtetë: forca mund të fitojë luftërat, por kurrë nuk mund të ndërtojë një paqe të drejtë,” deklaroi Hoxhaj para dhjetëra liderëve politikë, diplomatësh dhe përfaqësuesish të shoqërisë civile nga mbarë bota. “Prandaj, dialogu është metoda e vetme për të arritur një paqe të qëndrueshme.”

Duke reflektuar mbi përvojën e tij në negociatat për pavarësinë e Kosovës dhe në ndërtimin e shtetit kosovar, Hoxhaj tha se kupton rëndësinë e paqes dhe nga përvoja jetësore.

“Rendi i vjetër po vdes, por ai i riu ende nuk ka lindur,” tha ai, duke shtuar se “bota sot nuk është e karakterizuar nga paqja e qëndrueshme në shekullin XXI; përkundrazi, ajo eklipson logjikën e shekullit XIX”.

Hoxhaj shprehu shqetësim për rënien e funksionalitetit të institucioneve ndërkombëtare dhe paralizimin e mekanizmave për ruajtjen e paqes globale, si Këshilli i Sigurimit i OKB-së, OSBE-ja dhe OBT-ja.

“Proceset e paqes shpesh përdoren për të fituar kohë ose për të shtuar presion, jo si angazhime të vërteta për zgjidhjen e konflikteve,” theksoi ai.

Në përmbyllje, Hoxhaj bëri thirrje për një paradigmë të re të paqes, që përfshin drejtësinë, dinjitetin dhe ndërtimin e besimit në të gjitha nivelet. “Në këto kohë të pasigurta, paqja dhe dialogu duhet të mbrohen – jo vetëm si një imperativ moral, por si një nevojë strategjike,” përfundoi ai.

Komento:

	Komenti