Trump thotë se të dielën mund të vendosë nëse do të rifillojë luftën me Iranin

Presidenti i SHBA-së, Donald Trump, tha s e ditën e sotme do të takohet me këshilltarët kryesorë për të shqyrtuar propozimin më të fundit të Iranit dhe se mund të vendosë deri të dielën nëse do të rifillojë veprimet ushtarake kundër Teheranit.

Trump, duke folur për Axios në një intervistë telefonike, i përshkroi gjasat për arritjen e një marrëveshjeje me Iranin si një “50/50 solide”.

Presidenti gjithashtu tha se rezultati mund të çojë ose në një marrëveshje “të mirë” ose që SHBA të zgjedhë t’i “shkatërrojë plotësisht”.

Trump tha se takimi për të shqyrtuar përgjigjen më të fundit të Iranit do të përfshinte të dërguarin Steve Witkoff dhe këshilltarin Jared Kushner, ndërsa zëvendëspresidenti JD Vance pritet gjithashtu të marrë pjesë në bisedime, sipas Axios. Presidenti amerikan gjithashtu pritet të zhvillojë një telefonatë me liderë të Gjirit, Pakistanit, Turqisë dhe Egjiptit për të diskutuar diplomacinë me Iranin, tha për CNN një burim nga rajoni.

Më herët të shtunën, zyrtarë amerikanë dhe iranianë sugjeruan se mund të jenë më afër arritjes së një marrëveshjeje kornizë për t’i dhënë fund luftës, pasi ndërmjetës nga Katari dhe Pakistani zhvilluan bisedime në Teheran.

“Mund të ketë lajme më vonë sot. Nuk kam lajme për ju pikërisht në këtë moment, por mund të ketë disa lajme pak më vonë sot. Mund edhe të mos ketë. Shpresoj që të ketë, por ende nuk jam i sigurt,” u tha gazetarëve në New Delhi të shtunën sekretari amerikan i Shtetit, Marco Rubio.

Përpjekjet për ndërmjetësim vijnë pasi Trump u takua me zyrtarët kryesorë të sigurisë kombëtare të SHBA-së për të diskutuar hapat e ardhshëm në luftë, përfshirë mundësinë e rifillimit të luftimeve.

Rubio tha se përpjekjet diplomatike vazhdojnë prapa skenave dhe se Washingtoni mbetet i përqendruar që të sigurojë se Irani nuk mund të posedojë armë bërthamore dhe të adresojë rezervat e tij të uraniumit të pasuruar.

“Edhe ndërsa po flas me ju tani, po bëhet një punë,” tha Rubio. “Ekziston mundësia që, qoftë më vonë sot, nesër apo pas disa ditësh, të kemi diçka për të thënë.”

Ndërkohë, Trump gjithashtu shprehu optimizëm të shtunën, duke thënë në një intervistë për CBS News se kishte parë një draft të propozimit të Iranit dhe se të dyja palët po “afrohen shumë” drejt një marrëveshjeje.

Trump nuk tha nëse do ta pranojë draftin, duke thënë: “Nuk mund t’ju tregoj juve para se t’u tregoj atyre, apo jo?”.