Ky është shoferi i “Taxi Tesla” që dyshohet se kërcënoi kolegun me armë dhe bëri kaos në rrugët e Prishtinës

Gentian Makolli është shoferi i kompanisë “Taxi Tesla”, i cili dyshohet se u përfshi në një incident serioz që alarmoi Policinë e Kosovës dhe përfundoi me ndalimin e tij për 48 orë.

Burime të Sinjalit bëjnë të ditur se ngjarja ndodhi pasditen e 30 majit në rrugën “Uran Ajeti” në Prishtinë, ku fillimisht u raportua një konflikt mes dy kolegëve të kompanisë.

Sipas kallëzimit të viktimës, i dyshuari e kishte kanosur dhe gjatë përplasjes i kishte nxjerrë një armë, duke shkaktuar frikë dhe shqetësim. Arma e sekuestruar më pas nga Policia ka rezultuar të jetë lodër.

Pas raportimit të rastit, Policia ka nisur kërkimin e të dyshuarit, ndërsa nga kompania “Taxi Tesla” është siguruar informacion për vendndodhjen e tij.

Sinjali mëson se gjatë tentativës për lokalizimin e tij, Makolli dyshohet se ka kryer manovra të rrezikshme në trafik, duke lëvizur me shpejtësi, duke rrezikuar pjesëmarrësit e tjerë në komunikacion dhe duke hyrë në kahun e kundërt të qarkullimit në disa segmente rrugore.

Më pas ai kishte braktisur veturën në rrugën “Armend Daci” dhe ishte larguar nga vendi i ngjarjes.

Pas disa orësh, i dyshuari është vetëdorëzuar në Polici, ku është intervistuar në prani të avokatit mbrojtës.

Me urdhër të Prokurorit kujdestar, ndaj tij është iniciuar procedurë për veprat penale “Kanosje” dhe “Rrezikim i trafikut publik me veprim apo mjet të rrezikshëm”, ndërsa është dërguar në mbajtje për 48 orë.

Hetimet për rastin janë duke vazhduar.