Vrasja e “Radullës” në Prishtinë, Prokuroria nis analizimin e video-incizimeve

Arblind Pireva, është personi që dyshohet se qëndron pas vrasjes së rëndë që tronditi Prishtinën mbrëmjen e së martës.

Lidhur me këtë, Prokuroria Themelore në Prishtinë ka bërë të ditur se, menjëherë pas pranimit të informatave, njësitet relevante kanë dalë në vendin e ngjarjes.

“Menjëherë pas pranimit të informatave nga Policia e Kosovës, në vendin e ngjarjes kanë dalë Kryeprokurori i Prokurorisë Themelore në Prishtinë, Prokurori Kujdestar nga Departamenti për Krime të Rënda, si dhe njësitet e tjera relevante, të cilët kanë ndërmarrë të gjitha veprimet e nevojshme hetimore”, thuhet në njoftimin e Prokurorisë.

Në kuadër të këtyre veprimeve është mundësuar edhe sigurimi dhe analizimi i video-incizimeve nga kamerat e sigurisë, të cilat do të shërbejnë për zbardhjen e plotë të rrethanave të këtij rasti.

“Po ashtu, në vendin e ngjarjes ka dalë edhe njësia K9, me qëllim të gjurmimit të lëvizjeve të personit të dyshuar dhe viktimës. Ndërkaq, me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore, në Prishtinë për obduksion”.

Burimet e Sinjalit bëjnë me dije se ai dyshohet se e qëlloi për vdekje Agron Hajdarin në rrugën “Rifat Berisha”, ku viktima mori plagë të rënda nga arma e zjarrit në kokë, gjoks dhe shpinë.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.